La Tregua (Gianluca Gennari)

Cara Madalena,
qé i spara ind ogne istant,
sem tœts cond i pé ind l’aqua giaçada,
l’è un continuo a fiocar,
a diferenza de qei qe i comanda:
lor i è bon indoma a parlar.

Dimentega miga una roba:
qe cond mè mama e mè popà
qe insema ai mè fradei,
quand i me trarà mort in terra,
té ta sareet l’ultem, l’ultem dei mè penser,
Ta sareet un pont de ripartenza
se mai un dé ritornaroo a cà.

L’è Nedal, l’è Nedal,
in mez a qest infern
ma l’è Nedal.

Qé la noit la ge fa sempr pora
se sentem prope tant’mè tants rats
g’hoo voia de saltar fora de qé
doman l’è el dé de Nedal
ma se prove a meter fora el coo de la buxa
qé i me fa la pell.

Tant de perdir-g a g’hoo nigot
se more miga inco
l’è prope un poo probabel qe moraroo doman.
Son miga l’uneg a morir de la voia
de impiantar-la lé de sparar
e una partida prest a balla
fra duu minuts la cominçarà.

L’è Nedal, l’è Nedal,
in mez a qest infern
ma l’è Nedal
L’è Nedal, l’è Nedal,
g’hem de difender Patria e dignitaa,
ma l’è Nedal.

Dedree a i fuxii g’è miga dei “barbari”, tant’mè i g’ha fait creder
ma dei om, qe anc pò se i è pell e oss
sota la divisa un cor qe al peca fort,
i g’ha a cà fameie, e done e fioi,
i g’ha sogn e de le speranze,
i g’ha amor per la so jent per la so terra
prope come mé.

L’è Nedal, l’è Nedal,
g’hem de difender Patria e dignitaa
ma l’è Nedal.

De lontan se sent un romor
l’è miga una campana qe sona
l’è miga qell qe al fa l’ “arbitro” qe
al se met adree a fis’ciar,
l’è el romor de una bomba: i ciama !
G’hem de riprender a sparar.

L’è Nedal, l’è Nedal,
in mez a qest infern
ma l’è Nedal
ma l’è Nedal
g’hem de difender Patria e dignitaa,
ma l’è Nedal, l’è Nedal.