Part 2 - Preambol

Jann Jacom Gabian al presenta l'argoment, le persone grande de la storia, e al fa una invocazion ai Sants.

Preambol

Adess ve cunte su la tremenda bataia e i faits qe i è sucedids a Romaneng tants agn fa per le brœte intenzion del grand Lorenz Anguillara. Lu l’era el comandant de l’esercit venezian a Crema, e al s’era metid ind el coo de assaltar el castell de Romaneng qe, in confront a le forze qe al g’hiva lu, l’era prope picinin: defait a Romaneng g’era poc armaments e soldads.

Ma la bravura a combater e la granda sperienza del Bassian Piat e de la jent de Romaneng i è staits assee per resistir a un assaltament compagn. A la fin de la storia, i cativ proposits del Lorenz, i è servids a nigot per lu. El Jerolem Zardin, un om istruid qe l’era anc pò el dotor del pais, l’è stait bon de mandar via da le mura del castell tœte le s’cere de soldads qe el Lorenz l’era riessid a meter su insema per el so complot.

O glorios San Jorj, té qe ta seet el protetor de la nosta Patria e qe ta comandet l’esercit del Signor, ven qé de banda de num! Vœtom a desmentegar-s miga dei fœg de la guerra, smorzads da la to forza celesta e da la potenza de San Paol!

A la fin de la bataia, i è staits i noster nemix qe i g’ha perdid, e la jent de Romaneng la g’ha podid alzar su a’l ciel el stendard de la vitoria !

Share this page